ភ្នំពេញ៖ កិច្ចប្រជុំពេញអង្គគណៈរដ្ឋមន្ត្រីដំបូង នីតិកាលទី៧ នៃរដ្ឋសភា ចាប់ផ្តើមធ្វើឡើងនៅវិមានសន្តិភាពនាព្រឹកថ្ងៃទី២៤ ខែសីហា ឆ្នាំ២០២៣ ក្រោមអធិបតីភាពនាយករដ្ឋមន្ត្រីកម្ពុជា កិត្តិទេសាភិបាលបណ្ឌិត ហ៊ុន ម៉ាណែត។

ក្នុងកិច្ចប្រជុំពេញអង្គគណៈរដ្ឋមន្ត្រីដំបូងនេះ មានរបៀបវារៈចំនួន៤ ដែលត្រូវយកមកពិភាក្សា។ របៀបវារៈទាំងនោះរួមមាន ១.ការប្រកាសដាក់ឱ្យអនុវត្តនូវយុទ្ធសាស្ត្របញ្ចកោណដំណាក់កាលទី១ ទី២. ការពិនិត្យ និងសម្រេច លើសេចក្តីព្រាងច្បាប់ស្តីពីការកែសម្រួលឈ្មោះក្រសួងទំនាក់ទំនង ជាមួយរដ្ឋសភា ព្រឹទ្ធសភា និងអធិការកិច្ចទៅជាក្រសួងអធិការកិច្ច ទី៣.ការពិនិត្យ និងសម្រេចលើសេចក្តីព្រាងច្បាប់ស្តីពីការបង្កើតលេខាធិការដ្ឋាន កិច្ចការព្រំដែន និងទី៤. ការណែនាំផ្សេងៗរបស់នាយករដ្ឋមន្ត្រីអំពីរបៀបរបបការងារ និងកិច្ចដំណើរការនៃគណៈរដ្ឋមន្ត្រី។

ការពិភាក្សាលើរបៀបវារៈទី១ គឺមានការអនុញ្ញាតឱ្យមានការផ្សាយផ្ទាល់តាមបណ្តោញសារព័ត៌មាន ចំពោះរបៀបវារៈទី២ ទី៣ និងទី៤ គឺការពិភាក្សាកិច្ចការផ្ទៃក្នុងដោយមិនមានឱ្យការផ្សាយផ្ទាល់នោះទេ៕